«Жемқорлықтың жолын кес»

24-ші қаңтар күні музейдің кіре беріс залына «Жемқорлықтың жолын кес» атты көрме қойылып, келушілерге түсіндірме жұмыстары жүргізілді. Мақсаты:Адам құқықтары жайлы түсінікті кеңейту, «Жемқорлық» қоғамымыздағы алаңдатып отырған келеңсіз көрініс екенін ұғындырып, жас ұрпақтың бойына патриоттық тәрбие қалыптастыру.

Самұраттың кісілік келбеті

23 қаңтар күні Әйтеке би аудандық музейінде “Рухани жаңғыру» бағдарламасы аясында ел қайраткері Алматұлы Самұраттың туғанына 175 жыл толуына орай «Самұраттың кісілік келбеті» тақырыбында тарихи сабақ өткізілді. Шараға аудандық кітапхана, мәдениет үйі қызметкерлері, көпсалалы колледж студенттері мен оқытушылары қатысты. Мақсаты: Өлке тарихында лауазымды қызметтер атқарған, отырықшылық кәсіпке ден қойған Алматұлы Самұраттың кісілік келбетін насихаттау.

«Бақашы әулиенің проза мен ауыз әдебиетіндегі орны»

16-қаңтар күні аудандық музей залында «Рухани жаңғыру» бағдарламасы аясында «Бақашы әулиенің проза мен ауыз әдебиетіндегі орны» атты ақпараттық сағат өткізілді. Шараға аудандық ішкі саясат бөлімі мен М.Жұмабаев атындағы орта мектебінің ұстаздары және 8-10 сынып оқушылары қатыстырылды. Мақсаты: Өлке тарихынан зерттеліп-зерделеніп жатқан деректерді келушілерге ұсыну, оқиғаны зерттеуде проза мен ауыз әдебиетінің алар орнын насихаттау. Шара барысында Боқай батырдың қалай Бақашы атанғаны, Бақашыдан тараған даңқты ұрпақтары һақында, Бақашы қорымында жерленген ұлағатты би, ержүрек батырлар туралы сөз болды.

КЕЛЕЛІ КӨРМЕ КЕРЕМЕТТЕРІ

Абайдың "Жидебай-Бөрілі" мемлекеттік қорық музейінде Қазақстанның аса көрнекті тұлғалары Қауымдастығы өкілдерінің қатысуымен «Абай халық жүрегінде» атты көрменің ашылу салтанаты өтті. Алашты аузына қаратқан һәкім Абайдың соңғы кездері мұрағаттан табылған фото-құжаттары, тың деректері көрерменді терең тебіреніске бөледі.

Келелі істің бірі боп еліміздің түкпір-түкпіріндегі музейлер мен Абайдың «Жидебай-Бөрілі» мемлекеттік қорық-музейі арасындағы шығармашылық және ынтымақтастық байланысты арттыруға бағытталған меморандумға қол қойылды.

Музей мамандары Жидебай-Бөріліде!

Еліміздің әр тарапынан Семей саңлақтарының қадір-қасиетін ұлықтай келген музей майталмандары Күшікбай асуы, Еңлік-Кебек кесенесі, Ералы жазығы, Қанай белі, Арқалық, Аралтөбе сынды тарихи жерлерді аралап, тарихымен тыныстады. Бөрілідегі Мұхтар Әуезовтің, Жидебайдағы Абайдың музей-үйі мен Шəкəрімнің саят қорасын қызыға тамашалады.

АБАЙ МУЗЕЙІНДЕГІ РЕСПУБЛИКАЛЫҚ КОНФЕРЕНЦИЯ

Абайдың мемлекеттік қорық-музейінде «Ұлы даланың Ұлы есімдері» тақырыбындағы республикалық ғылыми-тәжірибелік конференция өтті. Конференцияға Қазақстанның аса көрнекті тұлғалары музейлерінің Қауымдастығы өкілдері қатысып, қазақтың сахара даласында ғұмыр кешкен тарихи тұлғалардың мемлекеттік және қоғамдық деңгейдегі сіңірген еңбектері мен жүріп өткен жолы баяндаманың арқауына айналды. Әбілқайыр хан музейі атынан барған аудандық музей қызметкері А.Жалмуханбетов Әбілқайыр жайында тың деректерді көпшілікке ұсынды.

Тарих танытқан тұлғалар

Әйтеке би аудандық музейі тәжірибе алмасу, өлкенің тарихын насихаттау мақсатында Ырғыз ауданына барды. Әйтеке би аудандық кітапхана қызметкерлері тарихи кітаптардан көрнекті көрме жасап, оқушылар назарына ұсынды. Аудандық музей тарапынан Ы.Алтынсарин атындағы орта мектебінде «Тарих танытқан тұлғалар» тақырыбында ақпараттық-танымдық шара ұйымдастырылды.